English (United Kingdom)Lao
ກອງປະຊຸມ ຄະນະກໍາມະການຮ່ວມ ຄະນະກຳມາທິການ ແມ່ນ້ຳຂອງສາກົນ ຄັ້ງທີ 45 PDF Print E-mail
Written by ພະແນກ ຂໍ້ມູນ-ຂ່າວສານ, ກຄມຊ   
Friday, 05 May 2017 15:56

 

ກອງປະຊຸມ ຄະນະກໍາມະການຮ່ວມ ຄະນະກຳມາທິການ ແມ່ນ້ຳຂອງສາກົນ ຄັ້ງທີ 45 ໄດ້ໄຂຂຶ້ນໃນລະຫວ່າງວັນທີ 25-27 ເມສາ 2017, ທີ່ ໂຮງແຮມ ຫຼວງພະບາງວິວ, ແຂວງ ຫຼວງພະບາງ ເປັນກຽດເຂົ້າຮ່ວມກ່າວເປີດກອງປະຊຸມ ຂອງ ທ່ານ ນາງ ມອນມະນີ ຍອຍບົວກ່ອງ, ຮອງລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ, ຮອງປະທານ ຄະນະກຳມະການ ແມ່ນ້ຳຂອງແຫ່ງຊາດລາວ, ສະມາຊິກສໍາຮອງ ສະພາມົນຕີ ຄະນະກໍາມາທິການ ແມ່ນໍ້າຂອງສາກົນ ສໍາລັບ ສປປ ລາວ ໂດຍມີຄະນະຜູ້ແທນເຂົ້າຮ່ວມຈາກ 04 ປະເທດສະມາຊິກແມ່ນໍ້າຂອງ ຄື: ກໍາປູເຈຍ, ລາວ, ຫວຽດນາມ ແລະ ໄທ, ກອງເລຂາ ຄະນະກຳມາທິການ ແມ່ນ້ຳຂອງສາກົນ ແລະ ຄະນະຜູ້ແທນຈາກ ສປ ຈີນ ໃນນາມປະເທດຄູ່ຮ່ວມເຈລະຈາ ຂອງ ຄະນະກໍາມາ ທິການແມ່ນໍ້າຂອງສາກົນ, ລວມທັງໝົດປະມານ 50 ທ່ານ.

 


ໃນບົດກ່າວເປີດ ກອງປະຊຸມ, ທ່ານ ນາງ ມອນມະນີ ຍອຍບົວກ່ອງ ໄດ້ຮຽກຮ້ອງໃຫ້ບັນດາສະມາຊິກ ຄະນະກໍາມະການຮ່ວມ ຄມສ ສືບຕໍ່ປະກອບສ່ວນຢ່າງຕັ້ງໜ້າ ໃນການປະກອບຄໍາເຫັນ ພ້ອມທັງ ໄດ້ສະແດງຄວາມເຊື່ອໝັ່ນ ຕໍ່ກັບ ຄະນະກໍາມະການຮ່ວມ ຄມສ ວ່າ ການປຶກສາຫາລືໃນກອງປະຊຸມຄັ້ງນີ້ ຈະເສີມສ້າງຄວາມ ຍືນຍົງ ແລະ ໝາກຜົນຂອງຜົນໄດ້ຮັບ ທີ່ດີຂຶ້ນໃຫ້ແກ່ອົງກອນ. ພາຍຫຼັງການກ່າວເປີດ ພິທີຢ່າງເປັນທາງການແລ້ວ, ກອງປະຊຸມ ໄດ້ດໍາເນີນໄປພາຍໃຕ້ການເປັນປະທານຂອງ ທ່ານ ປອ ອິນທະວີ ອັກຄະລາດ, ຮັກສາການ ຫົວໜ້າ ກອງເລຂາ ຄະນະກໍາມະການ ແມ່ນໍ້າຂອງແຫ່ງຊາດລາວ, ສະມາຊິກ ຄະນະກໍາມະການຮ່ວມ ຄະນະກໍາມາທິການ ແມ່ນໍ້າຂອງສາກົນ ສໍາລັບ ສປປ ລາວ, ປະທານ ຄະນະກໍາມະການຮ່ວມ ຄະນະກໍາມາທິການແມ່ນໍ້າຂອງສາກົນ ສໍາລັບປີ 2017.ກອງປະຊຸມໄດ້ຮັບຟັງ ການລາຍງານວຽກງານຕ່າງໆທີ່ໄດ້ດໍາເນີນນັບແຕ່ ກອງປະຊຸມ ຄະນະກໍາມະການຮ່ວມ ຄະນະກໍາມາທິການແມ່ນໍ້າຂອງສາກົນ ຄັ້ງທີ 44; ບົດລາຍງານ ການຮ່ວມມືກັບ ຄູ່ຮ່ວມເຈລະຈາ, ຄູ່ຮ່ວມພັດທະນາ ແລະ ພາກພື້ນ; ບົດລາຍງານ ການຈັດຕັ້ງປະຕິບັດວຽກງານຄຸ້ມຄອງອ່າງນໍ້າແບບປະສົມປະສານ (IWRM) ທີ່ນອນຢູ່ໃນ ແຜນພັດທະນາອ່າງແມ່ນໍ້າຂອງ ສົກປີ 2016-2020; ແລະ ຄວາມຄືບໜ້າ ຂອງ ການຈັດຕັ້ງ ປະຕິບັດ ການເປີດເຜີຍຂໍ້ມູນຂອງ ຄມສ; ການລາຍງານ ກ່ຽວກັບ ການດໍາເນີນການທາງດ້ານສະຖານີອຸທົກໃນອ່າງແມ່ນໍ້າຂອງ; ຄວາມຄືບໜ້າ ຂອງ ການສຶກສາສະພາມົນຕີ ຄມສ ໄລຍະທີ 2; ແລະ ການລາຍງານວຽກງານບໍລິຫານ ຄມສ ເຊັ່ນ: ສະພາບທາງ ດ້ານການເງິນ, ມາດຕະການປະຢັດໃນການຈັດກອງປະຊຸມລະດັບຊາດ ແລະ ພາກພື້ນ, ຄວາມຄືບໜ້າການຈັດຕັ້ງປະຕິບັດໂຄງຮ່າງ ການຈັດຕັ້ງໃໝ່ ລວມທັງ ການປັບປຸງນະໂຍບາຍບຸກຄະລາກອນ, ການປະເມີນ ຫົວໜ້າກອງເລຂາ ຄມສ, ການສ້າງຕັ້ງກຸ່ມຊ່ຽວຊານ ແລະ ວຽກງານອື່ນໆອີກຈໍານວນໜຶ່ງ. ນອກນັ້ນ, ຍັງໄດ້ປຶກສາຫາລື ແລະ ພິຈາລະນາວຽກງານ (i) ການຈັດຕັ້ງປະຕິບັດບັນດາລະບຽບການ ຂອງ ຄມສ ແລະ ວຽກງານຂອງ ຄະນະຮ່ວມເຮັດວຽກ ໃນການປັບປຸງ 5 ລະບຽບການ ລວມທັງ ການປັບປຸງຂະບວນການປຶກສາ ຫາລືກັນລ່ວງໜ້າ ຂອງ ໂຄງການເຂື່ອນໄຟຟ້າພະລັງນໍ້າປາກແບງ; (ii) ການປັບປຸງວຽກງານການກະຈາຍໜ້າວຽກຫຼັກ ໃຫ້ປະເທດ ສະມາຊິກ ຄມສ ໄລຍະທີ 2; ແລະ (iii) ໂອກາດການເຂົ້າເຖິງ ກອງທຶນອາກາດສີຂຽວ (Green Climate Fund-GCF). ໃນຕອນທ້າຍຂອງກອງປະຊຸມ, ບັນດາຫົວໜ້າຄະນະຜູ້ແທນ ຈາກປະເທດ ສະມາຊິກ ໄດ້ມີການລົງນາມ ເພື່ອຮັບຮອງເອົາບົດບັນທຶກ ກອງປະຊຸມຮ່ວມກັນ.ກອງປະຊຸມ ໄດ້ປິດລົງໃນວັນທີ 26 ເມສາ 2017 ດ້ວຍຜົນສໍາເລັດອັນຈົບງາມ ແລະ ໃນວັນທີ 27 ເມສາ 2017, ກອງເລຂາຄະນະກໍາມະການ ແມ່ນໍ້າຂອງແຫ່ງຊາດລາວ ຍັງໄດ້ນໍາພາຄະນະຜູ້ແທນກອງປະຊຸມ ລົງຢ້ຽມຢາມເຂື່ອນໄຟຟ້າພະລັງນໍ້າ ໄຊຍະບູລີ ເພື່ອເບິ່ງຄວາມຄືບໜ້າໃນການປັບປຸງ ແລະ ກໍ່ສ້າງເຂື່ອນດັ່ງກ່າວ.

 

Last Updated on Monday, 22 May 2017 14:45