Joom!Fish config error: Default language is inactive!
 
Please check configuration, try to use first active language

ການພົບປະສອງຝ່າຍ ລະຫວ່າງ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ (ລາວ-ຫວຽດນາມ)
ການພົບປະສອງຝ່າຍ ລະຫວ່າງ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ (ລາວ-ຫວຽດນາມ) PDF Print E-mail
Written by ພະແນກ ຂໍ້ມູນ-ຂ່າວສານ, ກຄມຊ   
Friday, 23 June 2017 15:45

ໃນທາມກາງບັນຍາກາດ ອັນຟົດຟື້ນທີ່ທົ່ວພັກ, ທົ່ວລັດ ແລະ ທົ່ວປວງຊົນ ພວມກະກຽມການສະເຫຼີມສະຫຼອງ ສອງວັນ ປະຫວັດສາດ ກໍ່ຄືວັນສ້າງຕັ້ງ ສາຍພົວພັນການທູດລະຫວ່າງ ສປປ ລາວ ແລະ ສສ ຫວຽດນາມ ຄົບຮອບ 55 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມືແບບພິເສດລາວ-ຫວຽດນາມ ຄົບຮອບ 40 ປີ, ຫຼາຍໆຂົງເຂດໄດ້ມີການ ຮ່ວມມື, ຮັດແໜ້ນ ແລະ ຂະຫຍາຍການຮ່ວມມືແບບພິເສດ ຂອງ ສອງຊາດລາວ-ຫວຽດນາມ, ຄ່ຽງຄູ່ກັນນັ້ນ ຂົງເຂດຊັບ ພະຍາກອນທຳມະຊາດ ແລະ ສິ່ງແວດລ້ອມກໍ່ໄດ້ເອົາໃຈໃສ່ປະກອບສ່ວນ ແລະ ເພີ່ມທະວີສາຍພົວພັນໃນດ້ານດັ່ງກ່າວ. ໃນວັນທີ 12 ມີຖຸນາ 2017 ທີ່ນະຄອນຫຼວງວຽງຈັນ, ສປປ ລາວ, ທ່ານ ເຈີນຮົງຮາ, ລັດຖະມົນຕີ ກະຊວງ ຊັບພະຍາກອນ ທຳມະຊາດ ແລະ ສິ່ງແວດລ້ອມ, ປະທານ ຄະນະກຳມະການ ແມ່ນໍ້າຂອງແຫ່ງຊາດ ສສ ຫວຽດນາມ ພ້ອມດ້ວຍຄະນະ ໄດ້ມາຢ້ຽມຢາມ ແລະ ເຮັດວຽກ ກັບກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ສປປ ລາວ ໂດຍໄດ້ຮັບການຕ້ອນຮັບຈາກ ທ່ານ ສົມມາດ ພົລເສນາ, ລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ, ປະທານ ຄະນະກຳມະການ ແມ່ນໍ້າຂອງແຫ່ງຊາດລາວ. ຈຸດປະສົງການພົບປະໃນຄັ້ງນີ້ແມ່ນເພື່ອປືກສາຫາລື ບັນຫາຕ່າງໆ ກ່ຽວກັບ ໂຄງການເຂື່ອນປາກແບງ ເຊິ່ງທັງສອງຝ່າຍໄດ້ປຶກສາຫາລື ແລະ ແລກປ່ຽນຄຳຄິດເຫັນຢ່າງ ກົງໄປກົງມາ ກ່ຽວກັບ ຜົນຂອງຂະບວນການ ປຶກສາຫາລື ກັນລ່ວງໜ້າຂອງ ໂຄງການເຂື່ອນໄຟຟ້າພະລັງນໍ້າປາກແບງ (Procedure on Notification, Prior Consultation and Agreement-PNPCA Pakbeng Hydropower Project).

ໃນກອງປະຊຸມ, ຫົວໜ້າ ກອງເລຂາ ຄະນະກຳມະການແມ່ນໍ້າແຫ່ງຊາດ ສສ ຫວຽດນາມ ໄດ້ລາຍງານ ກ່ຽວກັບຜົນກອງປະຊຸມປຶກສາຫລື ລະດັບຊາດ ຂອງ ຫວຽດນາມ ຕໍ່ກັບຂະບວນການປຶກສາຫາລືກັນລ່ວງໜ້າ ຂອງ ໂຄງການ ເຂື່ອນ ໄຟຟ້າພະລັງນໍ້າປາກແບງ ໂດຍໄດ້ຍົກບັນຫາກ່ຽວກັບຂໍ້ມູນທີ່ບໍ່ພຽງພໍ ເປັນຕົ້ນ ບັນຫາທາງດ້ານອຸທົກກະສາດ ໂດຍສະ ເພາະການຮັກສາປະລິມານການໄຫຼຂອງນໍ້າ, ບັນຫາການລະບາຍຕະກອນ (ຕະກອນແຂວນລອຍ ເຊັ່ນ: ຝຸ່ນລະອອງທີ່ໄຫຼໄປ ຕາມນໍ້າ, ອື່ນໆ ແລະ ຕະກອນທັບຖົມ ເຊັ່ນ: ຫີນ ແລະຊາຍ ເປັນຕົ້ນ), ບັນຫາຂອງການເດີນເຮືອ, ບັນຫາທາງຜ່ານຂອງປາ, ບັນຫາທີ່ຕິດພັນກັບ ບໍລິມາດນໍ້າ ລວມທັງ ຜົນກະທົບຂ້າມ ຜ່ານຊາຍແດນ ແລະ ຄວາມປອດໄພຂອງເຂື່ອນ. ຕໍ່ກັບບັນຫາທີ່ ຝ່າຍຫວຽດນາມສະເໜີມານັ້ນ, ຜູ້ຕາງໜ້າ ຈາກກະຊວງ ພະລັງງານ ແລະ ບໍ່ແຮ່ ຂອງລາວ ໄດ້ລາຍງານໜ້າວຽກທີ່ ລັດຖະບານລາວ ກຳລັງຈັດຕັ້ງປະຕິບັດ ມາແລກປ່ຽນ ໃນກອງປະຊຸມ ກໍ່ຄື ວິທີແກ້ໄຂ ແລະ ຫຼຸດຜ່ອນຜົນກະທົບ ທີ່ພົວພັນເຖິງລະດັບນ້ຳ ສຳລັບການຜະລິດໄຟຟ້າຂອງເຂື່ອນ, ປະຕູລະບາຍຕະກອນ ທີ່ມາທັບຖົມຢູ່ໜ້າ ແລະ ຫຼັງເຂື່ອນ. ນອກຈາກນັ້ນ, ຝ່າຍ ລາວ ຍັງໄດ້ແຈ້ງຕໍ່ກອງປະຊຸມ ຮັບຊາບ ກ່ຽວກັບການຮ່ວມມືກັບ ບໍລິສັດທີ່ປຶກສາ ຂອງ ປະເທດ ອົດສະຕາລີ (Snowin Mountaine Australia Company) ເພື່ອມາຊ່ວຍສຶກສາ ແລະ ປັບປຸງ ການອອກແບບ ທາງຂຶ້ນ-ລົງຂອງປາ ລວມທັງການສໍາຫຼວດຊະນິດ ແລະ ຈໍານວນປາ ທີ່ຂື້ນລົງ ຜ່ານຈຸດໂຄງການເຂື່ອນໄຟຟ້າພະລັງ ນໍ້າປາກ ແບງ. ພ້ອມດຽວກັນນັ້ນ, ກໍຍັງໄດ້ວ່າຈ້າງບໍລິສັດ ທີ່ປຶກສາ ຊີເອັນອາ ຂອງປະເທດຝຣັ່ງ (Compagnie Nationale du Rhône -CNR) ມາສຶກສາ ກ່ຽວກັບ ຄວາມປອດໄພ ແລະ ຄວາມໝັ້ນຄົງຂອງເຂື່ອນ ຕື່ມອີກດ້ວຍ. ທີ່ປະຊຸມ ທ່ານ ເຈີນຮົງຮາ, ລັດຖະມົນຕີ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ກ່າວວ່າ ສສ ຫວຽດນາມ ຈະໃຫ້ຄວາມຮ່ວມມືຢ່າງເຕັມທີ່ ໃນການຈັດຕັ້ງປະຕິບັດຂະບວນການປຶກສາຫລືດັ່ງກ່າວ. ພ້ອມດຽວກັນນັ້ນ, ຍັງໄດ້ຊົມຊີຍ ພາກສ່ວນທີ່ກ່ຽວຂ້ອງ ຂອງ ສປ ລາວ ໂດຍສະເພາະ ກະຊວງ ພະລັງງານ ແລະ ບໍ່ແຮ່ ທີ່ໃຫ້ການຮ່ວມມື ແລະ ຕອບສະໜອງຂໍ້ມູນ-ຂ່າວສານຢ່າງກົງໄປກົງມາ ເພື່ອສະໜັບສະໜູນໃນການປັບປຸງ ແລະ ແກ້ໄຂບັນຫາ ທີ່ຕິດພັນກັບ ຜົນກະທົບ ຂອງການສ້າງເຂື່ອນ. ພ້ອມດຽວກັນນັ້ນ, ທ່ານກໍ່ໄດ້ຮັບຮູ້ ແລະ ເຂົ້າໃຈ ບັນດາຄຳເຫັນຈາກຊ່ຽວຊານ ພາຍໃນ ແລະ ຕ່າງປະເທດ ລວມທັງ ນັກວິທະຍາສາດ ໂດຍສະເພາະ ຄຳເຫັນຈາກ ກອງເລຂາ ຄະນະກຳມາທິການ ແມ່ນໍ້າຂອງສາກົນ ທີ່ໄດ້ຄົ້ນຄວ້າ ແລະ ສະເໜີມາດຕະການແກ້ໄຂຜົນກະທົບ ທາງດ້ານສິ່ງແວດລ້ອມ, ແຜ່ນດິນໄຫວ ແລະ ຜົນກະທົບ ຂ້າມຜ່ານຊາຍແດນ ພ້ອມທັງ ໄດ້ເອົາໃຈໃສ່ໃນການຈັດຕັ້ງປະຕິບັດ ຂະບວນການຢ່າງສົມເຫດສົມຜົນ ຂອງເຂື່ອນໄຟຟ້າ ປາກແບງ. ລັດຖະມົນຕີ ສສ ຫວຽດນາມ ໄດ້ສະເໜີໃຫ້ຝ່າຍລາວ ພິຈາລະນາ ການພັດທະນາເຂື່ອນໄຟຟ້າພະລັງນໍ້າ ໃຫ້ມີມາດຕະຖານສາກົນ ໂດຍຄໍານືງເຖິງການຮັບປະກັນ ຜົນປະໂຫຍດ ໃນການພັດທະນາເສດທະກິດ ຂອງ ສ ປປ ລາວ ກໍ່ຄື ຜົນປະໂຫຍດຮ່ວມມືກັນ ຂອງ ບັນດາປະເທດສະມາຊິກແມ່ນໍ້າຂອງ ເພື່ອຮັບປະກັນ ຄວາມ ໝັ້ນຄົງທາງ ດ້ານເສດ ຖະກິດ-ສັງຄົມ ແລະ ວັດທະນາະທຳ ຕາມລຳແມ່ນໍ້າຂອງ. ຈາກນັ້ນ, ທ່ານ ສົມມາດ ພົລເສນາ, ລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມໄດ້ຕີລາຄາສູງຕໍ່ກັບ ຄຳເຫັນຄິດເຫັນ ຂອງ ຝ່າຍ ຫວຽດນາມ ແລະ ເຫັນໄດ້ວ່າຂໍ້ມູນດັ່ງກ່າວເປັນຂໍ້ມູນທີ່ສຳຄັນ ເພື່ອໃຫ້ ຝ່າຍລາວ ໄດ້ນໍາໄປປັບປຸງເພີ່ມເຕີ່ມ ເພື່ອໃຫ້ ໄດ້ຊຶ່ງ ໝາກຜົນ ອັນຈົບງາມຂອງ ຂະບວກການປຶກສາຫາລືດັ່ງກ່າວ. ສປປ ລາວຈະສືບຕໍ່ໃຫ້ຄວາມຮ່ວມມືກັບ ບັນດາຊ່ຽວຊານ ຂອງ ຄະນະ ກຳມາທິການແມ່ນໍ້າຂອງສາກົນ ແລະ ຄະນະກຳມະການແມ່ນໍ້າຂອງແຫ່ງຊາດ ຂອງບັນດາປະເທດສະມາຊິກ ໃນການ ແລກປ່ຽນ ຂໍ້ມູນ ແລະ ຕີລາຄາຂໍ້ຄິດເຫັນ ຂອງບັນດາ ພາກສ່ວນທີ່ກ່ຽວຂ້ອງ ດ້ວຍຄວາມຮັບຜິດຊອບ ເພື່ອຮັບປະກັນສິດ ຜົນປະໂຫຍດ ຂອງບັນດາ ປະເທດ ສະມາຊິກແມ່ນໍ້າຂອງ ບົນພື້ນຖານ ສັນຍາ ແມ່ນໍ້າຂອງ 1995.